Skip to content

IEM - Instituto de Estudos Miñoranos

Increase font size Decrease font size Default font size

Destacados

Convocatoria Asemblea Xeral Socios/as. Luns 25 de marzo.

Por medio da presente, convócase aos socios/as á Asemblea Xeral de Socios/as da asociación Instituto de Estudos Miñoráns con CIF: G-36867471 que se celebrará no lugar, data e hora abaixo indicados, segundo a orde do día que se especifica.

TIPO DE REUNIÓN: ASEMBLEA XERAL

DATA DA REUNIÓN: Luns 25 de marzo de 2019

HORA DA SESIÓN, 1ª convocatoria: 19:30 HORAS

HORA DA SESIÓN, 2ª convocatoria: 20:00 HORAS

LUGAR: Aula de Cultura Ponte de Rosas, sede do IEM, Avda. da Feira, 10 Baixo 36380 Gondomar.

ORDE DO DÍA:

1. Lectura e aprobación, se procede, da acta da reunión anterior, correspondente á Asemblea Xeral do 7 de febreiro de 2018.

2. Informe director.

3. Aprobación se procede das Contas anuais 2018 da asociación.

4. Informe actualizado do número de socios/as e altas no ano 2018.

5. Informe actualizado sobre as diferentes convocatorias de axudas solicitadas aos distintos organismos institucionais.

6. Presentación da Memoria de actividades 2018 da asociación.

7. Proxectos para o ano 2019.

8. Rogos e preguntas.

Informámoslles que están a súa disposición, no local do IEM, as actas nomeadas na orde do día para a súa aprobación e as contas do IEM.

Está en:  Inicio Arqueoloxia Artigos Eloy Martínez, Xosé Lois Vilar e Xilberte Manso presentan en Italia os resultados do Proxecto Equus
Skip to content
Eloy Martínez, Xosé Lois Vilar e Xilberte Manso presentan en Italia os resultados do Proxecto Equus PDF Imprimir Correo-e

Arqueoloxía - Novas
Escrito por IEM -Sec   
Xoves, 30 Agosto 2018 17:20
2018-08-30-covadeamorinalta00contraste

Eloy Martínez, Xosé Lois Vilar e Xilberte Manso, membros da sección de arqueoloxía do Instituto de Estudos Miñoráns (IEM), presentaron onte algunhas xoias da arte rupestre do sur da provincia de Pontevedra e do norte de Portugal no XX Congreso Internacional sobre a arte rupestre (IFRAO). A investigación, enmarcada dentro do Proxecto Equus, ten como obxectivo o estudo dos petróglifos con representación de équidos existentes no sur da provincia de Pontevedra e no norte de Portugal. Trátase dun proxecto iniciado oficialmente en 2015, pero que en realidade remonta a súa orixe a máis de 10 anos vinculados coa investigación da arte rupestre e, neste caso, coas escenas de caza dos petróglifos galegos e portugueses.

O proxecto

 

O proxecto vén de confirmar a existencia dun novo paradigma no modelo de representación de cuadrúpedos na arte naturalista. Mentres que cara o norte do fondo da Ría de Vigo o animal multirrepresentado é o cervo nas escenas de caza, cara o sur da provincia de Pontevedra e norte de Portugal o animal preponderante pasa a ser o équido, sendo escasas as mostras nas que o cervo está representado. A presentación do proxecto tivo lugar no Palzzi dei Congressi d’arte Rupestre, en Darfo Boario Terme, e está enmarcada na sesión And the Holocene arrived. Post Palaeolithic Rock Art around the World (“Arte rupestre post-paleolítico de todo o mundo”).

Presentación dalgúns petróglifos do Val Miñor

Durante a comunicación, guiada por Eloy Martínez, déronse a coñecer algúns dos petróglifos con escenas de caza do Val Miñor como o Outeiro dos Lameiros (Baiona), a Tomada da Regueira dos Barreiros, As Covas de Amorín, A Chan do Outeiro e Os Outeiros Grandes, entre outros, todos estes últimos situados no concello de Gondomar.