Skip to content

IEM - Instituto de Estudos Miñoranos

Increase font size Decrease font size Default font size

Destacados

PROSPECCIÓN ARQUEOLÓXICA, DOCUMENTACIÓN E RESTAURACIÓN DOS PETRÓGLIFOS DE GARGAMALA (Mondariz, Pontevedra)

Este proxecto de prospección arqueolóxica, documentación e restauración dos petróglifos de Gargamala (Mondariz), promovido polo Servizo de Arqueoloxía da Dirección Xeral de Patrimonio Cultural da Consellería de Cultura e Turismo, será executado polo equipo técnico multidisciplinar do Instituto de Estudos Miñoráns (IEM) dirixido e coordinado polo historiador e arqueólogo Xosé Lois Vilar Pedreira e do que forman parte: María Dolores Álvarez Rey, Eloy Martínez Soto, Bruno Centelles García, Xilberte Manso de la Torre, José Antonio Viña Arias, Eduardo Méndez-Quintas, Andrea Serodio Domínguez, Manuel Ledo Bernárdez e Jesús Rodríguez Diéguez coa colaboración especial, nas tarefas de prospección, de Cándido Verde e José Álvarez Alonso (O Buraco).

Nos días 5 e 6 de outubro de 2018 un incendio arrasou 150 Ha das parroquias de Sabaxáns e Gargamala (Mondariz) que afectou a área nuclear dos petróglifos de Gargamala con distinto grao de incidencia (termoclastos, ennegrecemento da superficie, arrastes de depósitos sobre as superficies) e deixando unha paisaxe depauperada e a pracer dunha forte erosión da tona terrea.

O conxunto de petróglifos obxecto desta actuación sitúase entre os 400 e os 470 m.s.n.m.. A gran maioría deles ocupando a parte alta dos outeiros (GA 36030023-18-11), as valgadas entre eles no caso do Campado (GA 36030055-14-15-54), chans como Campo Redondo (GA 36030038) cun amplísimo dominio visual ,que chega á Serra do Galiñeiro, parello ó emprazamento dos petróglifos da Coutada (Taboexa, As Neves) ou As Portaxes no Monte Tetón (Tebra, Tomiño) tamén obxecto de prospección, estudo, posta en valor e musealización por parte do Instituto de Estudos Miñoráns.

Na zona de actuación destaca a presenza dun ulleiro aproveitado polos veciños para a traída de augas doméstica e na outra vertente hai varios muíños hidráulicos.
Estamos ó redor das coordenadas 545.686/4.679.970 
(datum: ETRS 1989, fuso 29).

Esta concentración de petróglifos atópase na parroquia de Gargamala, no concello de Mondariz, composta polas aldeas de Vedrelos e O Soutiño na zona meridional e A Rúa, Mourelle, Boente e O Barro. A parroquia está rodeada por Frades, Riofrío, Sabaxáns e Toutón como freguesías do mesmo concello e polo norte polas de Traspielas e Ventín do concello de Fornelos de Montes. Estamos no sur do Suído nun mundo de serra onde as aldeas escasean e foi zona tradicional de pastoreo que deixou pegadas etnográficas nos chozos, neveiras, cerres para o gado e nos foxos de lobo.
Estamos no val medio-alto do río Tea cara o que drenan os núcleos habitados de Gargamala. A zona noroeste do Castro Chouso, O Foxo do Lobo, A Chan de Cairón... botan as augas no río Barragán que desauga no río Oitavén ó pé do castro da Cidade (Calvos, Fornelos) na mesma presa das Eiras.


Está en:  Inicio
Skip to content
Mesa Redonda: Pola Protección da serra do Galiñeiro. PDF Imprimir Correo-e

O IEM - Novas
Mércores, 22 Decembro 2010 15:24
cartel_mesa_redonda_galieiro

O Instituto de Estudos Miñoranos convoca a unha mesa redonda Pola protección da Serra do Galiñeiro para o próximo martes 28 de decembro ás 20 horas na Aula de Cultura Ponte de Rosas, na Avenida da Feira Nº 10, Baixo, Gondomar. Ante a inminente conversión do emblemático parque natural en parque eólico o IEM xunto as comunidades de montes veciñais, asociacións de veciños, plataformas para a defensa dos dereitos ambientais, clubes deportivos e moitas outras institucións queremos levar a diante esta instancia de debate na búsqueda de alternativas para salvaguardar e defender o patrimonio natural do Val Miñor.


Na mesa debaterase sobre:
A tramitación das figuras de protección máis acaídas a este espazo.
Os efectos da declaración desas figuras, os usos compatibles e a influenza socioeconómica.
Os valores da serra, claves a destacar ante un estudo de impacto ambiental.
Interveñen:
Francisco J. Benítez Gómez: Biólogo. Director técnico de ALCIONE, consultoría de impacto ambiental.
Adolfo Cordero Rivera: Catedrático de Ecoloxía Evolutiva da Universidade de Vigo. Ex membro do Observatorio Galego sobre a Conservación da Natureza.
Gonzalo Puerto Arribas: Director do Parque Natural de Aloia. Técnico provincial da Rede Natura en Pontevedra.
Convocantes: ADEGA, A RÍA NON SE VENDE, ASOCIACIÓN DE VECIÑOS DE VINCIOS, ASOCIACIÓN "A GROBA", ASOCIACIÓN DE VECIÑOS CASCO VELLO DE VIGO, CENTRO SOCIAL CULTURAL DEPORTIVO DE TAMEIGA "AS PEDRIÑAS", COMUNIDADE DE MONTES DE VINCIOS, CLUB DE ESPELEOLOXIA "O MAÚXO", INSTITUTO DE ESTUDOS MIÑORANOS, MONTAÑEIROS CELTAS, PLATAFORMA POLA DEFENSA DA RÍA DE VIGO "CIES", SALVEMOS MONTEFERRO, S.O.S. GROBA, VERDEGAIA.