Skip to content

IEM - Instituto de Estudos Miñoranos

Increase font size Decrease font size Default font size

Destacados

XEIRA IEM-Nigrán (Ramallosa)- "San Pedro da Ramallosa. Monumentos, lendas e paisaxes." Luns 14 de agosto, ás 18:30 h.

O vindeiro luns 14 de agosto, gozaremos dunha nova xeira polo concello de Nigrán na parroquia da Ramallosa "San Pedro da Ramallosa. Monumentos, lendas e paisaxes.", dentro do programa das xeiras de verán 2017 do IEM, e coa colaboración do concello de Nigrán, que será guiada polo especialista Antonio Soliño Troncoso.

A xeira ten como punto de encontro a Capela de San Campio na Ramallosa ás 18:30h.

Enlace ao punto de encontro:

https://drive.google.com/open?id=1N-J6l4qswZsjkAPwG1WpUFat8b8&usp=sharing

AS XEIRAS DO IEM. VERÁN 2017
SAN PEDRO DA RAMALLOSA. MONUMENTOS, LENDAS E PAISAXES.

Guiada por
ANTONIO SOLIÑO TRONCOSO

A XEIRA. APROXIMACIÓN.
A parroquia de San Pedro da Ramallosa era coñecida no século XII como San Pedro de Filgueira, transformándose máis tarde en Filgueiras, denominación que segundo os libros parroquiais aínda mantiña a mediados do XVIII, antes de mudar para a actual. Durante o Antigo Réxime integrou o Partido de Val de Miñor polo que no político e gobernativo se debía ao Procurador Xeral do devandito Partido mentres que no contencioso estaba baixo xurisdición do Xuíz do reguengo de Baiona. Coa chegada dos concellos constitucionais San Pedro pasa a integrar o de Nigrán o 7 de decembro de 1836, ratificado mediante R.O. en febreiro do ano seguinte.
Esta xeira pretende complementar a que con final en Panxón realizou o IEM polos areais da parroquia o ano pasado. Aquela tivo como fío condutor o Rexionalismo arquitectónico e a repercusión que sobre algunhas das intervencións exerceron indianos nados nela. A presente, cunha motivación máis variada, atenderá a parámetros históricos, monumentais, paisaxísticos, etnográficos,... e rematará enlazando co tema da pretérita citada, o Rexionalismo e os indianos. Entre outras pezas comentaremos a capela e cruceiro de San Campio emprazadas a carón do esteiro do río Miñor; a medieval ponte da Ramallosa, unha das máis belas de Galicia; as distintas edificacións do pazo de Pías; a murada granxa da Robaleira, de século XVI; un tramo da antiga Estrada Real ao Val da Louriña; a parroquial de orixe románica e o cemiterio hixienista no que asentan monumentais panteóns; a primeira adega de viño espumoso do Val de Miñor; cruceiros do XVI e XVII; e arquitectura rexionalista construída por indianos en emprazamentos de privilexio. Tamén falaremos de encrucilladas e lendas, de persoeiros e algúns dos seus soños, de árbores senlleiras e paisaxes feridas. Todo durante as aproximadamente tres horas e cuarto que nos levará percorrer os cómodos catro quilómetros e medio de trazado previsto.

 

Está en:  Inicio
Skip to content
40 organizacións reclaman a protección da Serra da Groba PDF Imprimir Correo-e

O IEM - Novas
Xoves, 22 Marzo 2012 13:08
serragroba

40 organizacións ecoloxistas, de defensa do patrimonio cultural e veciñais, vimos de presentar de maneira conxunta alegacións á Proposta de ampliación da rede Natura 2000 de Galicia, elaborada pola Dirección Xeral de Conservación da Natureza da Consellería do Medio Ambiente, Territorio e Infraestruturas. A citada Proposta estivo aberta á participación pública até o pasado sábado, día 17 de marzo.
Queremos manifestar, nomeadamente, o noso total desacordo coa delimitación do LIC (Lugar de Importancia Comunitaria) Serra da Groba e Monte da Valga.
Queremos denunciar que a extensión do novo LIC é claramente insuficiente, impedindo que se poidan protexer de maneira efectiva os valores naturais máis representativos desta serra litoral.
A delimitación que propón a administración galega exclúe do espazo protexido a maior parte das turbeiras e breixeiras húmidas que existen na serra da Groba. Paradoxalmente, a presenza destes hábitats no espazo natural foi a razón esgrimida pola propia Xunta de Galicia para a declaración deste LIC de nova creación, en cumprimento da Decisión 2004/813/CE da Unión Europea.
Nesta decisión comunitaria, a Unión Europea insta ao Estado Español a ampliar a protección destes hábitats na rede europea Natura 2000, pois considéraos insuficientemente representados. Este incumprimento da normativa comunitaria en territorio galego, xa motivou de feito unha condena do Tribunal de Xustiza comunitario ao estado español.
Como dato revelador, segundo os nosos cálculos case o 70% da superficie de turbeiras do sistema montañoso da Groba quedaría fóra da área de protección.
Por outra parte, a delimitación do novo espazo protexido é absolutamente arbitraria, pois deixa fóra de protección toda a liña de cumes da serra, dando como resultado un trazado absurdo que vai en contra dos criterios máis básicos de ordenación do territorio e de delimitación de espazos protexidos.
A desprotección na que quedan sumidos os principais valores naturais da serra da Groba resulta evidente:
- Non se contempla a existencia de cervunais, unha tipoloxía de pasteiros de montaña amplamente distribuídos ao longo de toda a serra da Groba, considerados na normativa comunitaria como de conservación prioritaria.
- Na serra da Groba existen un mínimo de 3 especies vexetais incluídas no Catálogo Galego de Especies Ameazadas; dúas delas considéranse En Perigo de Extinción. As súas poboacións quedan excluídas da área protexida.
- O trazado do novo LIC constitúe unha nova ameaza para a sobrevivencia dunha das maiores poboacións de cabalo galego de monte, variedade de cabalo primitivo de grande valor xenético que cumpre un papel fundamental na conservación dos hábitats naturais e da biodiversidade da serra da Groba.
Por desgraza o que está a suceder coa serra da Groba non é unha excepción, pois a Proposta de ampliación da rede Natura que ven de presentar a Xunta de Galicia continúa deixando o noso país no último lugar en superficie protexida de todo o estado español, a máis de 10 puntos porcentuais por debaixo da media estatal. Iso a pesar de que somos a 3ª comunidade autónoma en nº de hábitats de interese comunitario por unidade de superficie (a media galega supera os 17 hábitats de interese comunitario por cada 100km2).
As organizacións que asinamos estas alegacións informamos á Xunta de Galicia da existencia de numerosos hábitats e especies amparados pola lexislación comunitaria (nomeadamente pola Directiva 92/43/CEE e pola Directiva 2009/147/CE, máis coñecidas como Directiva Hábitats e Directiva Aves, respectivamente.).
Acompañando as nosas alegacións adxuntamos ademais unha proposta alternativa, que inclúe unha memoria descritiva dos principais valores naturais da serra, así como diversos planos. Nestes planos representamos a distribución das principais turbeiras e hábitats prioritarios da zona, e ofrecemos unha delimitación alternativa para o novo Lugar de Importancia Comunitaria Serra da Groba e Monte da Valga. 

Para descargar a alegación completa preme aquí.

Simulación do parque eólico Albariño I na Serra da Groba

Dim lights Embed Embed this video on your site