Skip to content

IEM - Instituto de Estudos Miñoranos

Increase font size Decrease font size Default font size

Destacados

XEIRA IEM-Nigrán (Ramallosa)- "San Pedro da Ramallosa. Monumentos, lendas e paisaxes." Luns 14 de agosto, ás 18:30 h.

O vindeiro luns 14 de agosto, gozaremos dunha nova xeira polo concello de Nigrán na parroquia da Ramallosa "San Pedro da Ramallosa. Monumentos, lendas e paisaxes.", dentro do programa das xeiras de verán 2017 do IEM, e coa colaboración do concello de Nigrán, que será guiada polo especialista Antonio Soliño Troncoso.

A xeira ten como punto de encontro a Capela de San Campio na Ramallosa ás 18:30h.

Enlace ao punto de encontro:

https://drive.google.com/open?id=1N-J6l4qswZsjkAPwG1WpUFat8b8&usp=sharing

AS XEIRAS DO IEM. VERÁN 2017
SAN PEDRO DA RAMALLOSA. MONUMENTOS, LENDAS E PAISAXES.

Guiada por
ANTONIO SOLIÑO TRONCOSO

A XEIRA. APROXIMACIÓN.
A parroquia de San Pedro da Ramallosa era coñecida no século XII como San Pedro de Filgueira, transformándose máis tarde en Filgueiras, denominación que segundo os libros parroquiais aínda mantiña a mediados do XVIII, antes de mudar para a actual. Durante o Antigo Réxime integrou o Partido de Val de Miñor polo que no político e gobernativo se debía ao Procurador Xeral do devandito Partido mentres que no contencioso estaba baixo xurisdición do Xuíz do reguengo de Baiona. Coa chegada dos concellos constitucionais San Pedro pasa a integrar o de Nigrán o 7 de decembro de 1836, ratificado mediante R.O. en febreiro do ano seguinte.
Esta xeira pretende complementar a que con final en Panxón realizou o IEM polos areais da parroquia o ano pasado. Aquela tivo como fío condutor o Rexionalismo arquitectónico e a repercusión que sobre algunhas das intervencións exerceron indianos nados nela. A presente, cunha motivación máis variada, atenderá a parámetros históricos, monumentais, paisaxísticos, etnográficos,... e rematará enlazando co tema da pretérita citada, o Rexionalismo e os indianos. Entre outras pezas comentaremos a capela e cruceiro de San Campio emprazadas a carón do esteiro do río Miñor; a medieval ponte da Ramallosa, unha das máis belas de Galicia; as distintas edificacións do pazo de Pías; a murada granxa da Robaleira, de século XVI; un tramo da antiga Estrada Real ao Val da Louriña; a parroquial de orixe románica e o cemiterio hixienista no que asentan monumentais panteóns; a primeira adega de viño espumoso do Val de Miñor; cruceiros do XVI e XVII; e arquitectura rexionalista construída por indianos en emprazamentos de privilexio. Tamén falaremos de encrucilladas e lendas, de persoeiros e algúns dos seus soños, de árbores senlleiras e paisaxes feridas. Todo durante as aproximadamente tres horas e cuarto que nos levará percorrer os cómodos catro quilómetros e medio de trazado previsto.

 

Está en:  Inicio
Skip to content
Inaugurouse o curso "Dende o badal ao clic. A construción das novas sociedades rurais galegas", no IEM. PDF Imprimir Correo-e

Ciclos conferencias e obradoiros - Artigos
Escrito por IEM   
Xoves, 06 Setembro 2012 23:17
aula-ponte-de-rosas-2

En Galicia xa "non se sabe tocar as campás" e tampouco "se entenden" , reflexionou Xosé Luis Barreiro Rivas, director autonómico da Universidad Internacional Menéndez Pelayo (UIMP) na conferencia inaugural do curso "Dende o badal ao clic", que estase a desenvolver ata o vindeiro sábado en Gondomar. "Sucede que a sociedade xa non o necesita", engadiu. A intervención de Barreiro Rivas centrouse na crise do modelo rural tradicional e os seus imaxinarios sociais até o baleiro de estratexias alternativas na que se atopa, ao seu entender, o país nestes intres.
O acto inaugural desenvolvido na Aula de Cultura Ponte de Rosas (sede do IEM), contou tamén coa presenza da deputada provincial Marta Iglesias, quen felicitou á organización polos máis do medio centenar de persoas chegadas de toda Galicia, que responderon ao convite e matriculáronse no curso. Nese senso, informou que a colaboración entre Deputación de Pontevedra e a UIMP -de máis de 20 anos- aposta agora pola descentralización e puxo como exemplos as actividades desenvolvidas este ano en Pontevedra, Vigo, Cambados, Forcarei e esta en Gondomar.
Pola súa banda, José Eladio Ferrero Fontenla, director do curso, agradeceu a UIMP a confianza depositada no IEM para que o Val Miñor conte novamente cuns dos cursos desta prestixiosa institución. Logo de dar a benvida aos participantes, lembrou que o tema que motiva este encontro, naceu nunha conversa sostida con Barreiro Rivas no ano 2009, logo de rematar os cursos sobre arqueoloxía da UIMP, desenvolvidos nesta mesma sede. Daquela, as visibles transformacións que estaba a vivir a Galicia rural e periurbana, levounos a madurar esta iniciativa que concretase nestas xornadas.
A sesión inaugural tamén contou cunha intervención de Marcial Gondar Portosany, quen manifestou a necesidade de reconquistar os valores positivos da cultura tradicional, ser críticos cos novos modelos culturais vencellados á sociedade do consumo, e atopar estratexias sedutoras que permitan achegarllos ás novas xeracións.
Finalmente, Antonio Soliño Troncoso presentou un coloquio sobre a arquitectura dos pazos, senlleira e distintiva do país, a través dun análise dos actuais desafíos no mantemento deses patrimonios. Nomeadamente traballou sobre a Pouza de Vilares (Vilaza - Gondomar) e o Pazo do Conde de Gondomar (Gondomar). Rematando a xornada cunha visita guiada a este último.
O curso continuará este venres 7 de setembro ás 17 horas coas intervencións de Gerardo Pereira Menaut (USC) e Ofelia Rey Castelao (USC) sobre "A organización territorial no rural. Evolución histórico-social, política e administrativa". Posteriormente, terá lugar unha mesa redonda sobre "A formación e transformación do sistema de hábitat rural" integrada por especialistas no eido urbanístico e arquitectónico, coordinada por Vicente Pintos Santiago (IEM). A xornada rematará cunha visita guiada por Xosé Lois Vilar (IEM) ao casco histórico de Baiona.