Skip to content

IEM - Instituto de Estudos Miñoranos

Increase font size Decrease font size Default font size

Destacados

XEIRA IEM-Nigrán (Ramallosa)- "San Pedro da Ramallosa. Monumentos, lendas e paisaxes." Luns 14 de agosto, ás 18:30 h.

O vindeiro luns 14 de agosto, gozaremos dunha nova xeira polo concello de Nigrán na parroquia da Ramallosa "San Pedro da Ramallosa. Monumentos, lendas e paisaxes.", dentro do programa das xeiras de verán 2017 do IEM, e coa colaboración do concello de Nigrán, que será guiada polo especialista Antonio Soliño Troncoso.

A xeira ten como punto de encontro a Capela de San Campio na Ramallosa ás 18:30h.

Enlace ao punto de encontro:

https://drive.google.com/open?id=1N-J6l4qswZsjkAPwG1WpUFat8b8&usp=sharing

AS XEIRAS DO IEM. VERÁN 2017
SAN PEDRO DA RAMALLOSA. MONUMENTOS, LENDAS E PAISAXES.

Guiada por
ANTONIO SOLIÑO TRONCOSO

A XEIRA. APROXIMACIÓN.
A parroquia de San Pedro da Ramallosa era coñecida no século XII como San Pedro de Filgueira, transformándose máis tarde en Filgueiras, denominación que segundo os libros parroquiais aínda mantiña a mediados do XVIII, antes de mudar para a actual. Durante o Antigo Réxime integrou o Partido de Val de Miñor polo que no político e gobernativo se debía ao Procurador Xeral do devandito Partido mentres que no contencioso estaba baixo xurisdición do Xuíz do reguengo de Baiona. Coa chegada dos concellos constitucionais San Pedro pasa a integrar o de Nigrán o 7 de decembro de 1836, ratificado mediante R.O. en febreiro do ano seguinte.
Esta xeira pretende complementar a que con final en Panxón realizou o IEM polos areais da parroquia o ano pasado. Aquela tivo como fío condutor o Rexionalismo arquitectónico e a repercusión que sobre algunhas das intervencións exerceron indianos nados nela. A presente, cunha motivación máis variada, atenderá a parámetros históricos, monumentais, paisaxísticos, etnográficos,... e rematará enlazando co tema da pretérita citada, o Rexionalismo e os indianos. Entre outras pezas comentaremos a capela e cruceiro de San Campio emprazadas a carón do esteiro do río Miñor; a medieval ponte da Ramallosa, unha das máis belas de Galicia; as distintas edificacións do pazo de Pías; a murada granxa da Robaleira, de século XVI; un tramo da antiga Estrada Real ao Val da Louriña; a parroquial de orixe románica e o cemiterio hixienista no que asentan monumentais panteóns; a primeira adega de viño espumoso do Val de Miñor; cruceiros do XVI e XVII; e arquitectura rexionalista construída por indianos en emprazamentos de privilexio. Tamén falaremos de encrucilladas e lendas, de persoeiros e algúns dos seus soños, de árbores senlleiras e paisaxes feridas. Todo durante as aproximadamente tres horas e cuarto que nos levará percorrer os cómodos catro quilómetros e medio de trazado previsto.

 

Está en:  Inicio Conferencias e obradoiros Artigos Inscricións para o IX Curso de Verán "Crise vs Creatividade: os desafíos do audiovisual galego".
Skip to content
Inscricións para o IX Curso de Verán "Crise vs Creatividade: os desafíos do audiovisual galego". PDF Imprimir Correo-e

Ciclos conferencias e obradoiros - Artigos
Escrito por IEM   
Martes, 10 Xullo 2012 20:41
cartel-curso

O Instituto de Estudos Miñoranos convida a interesados a inscribirse no IX Curso de Verán de Extensión Universitaria "Crise vs Creatividade: os desafíos do audiovisual galego", a desenvolverse no concello de Celanova, os vindeiros días 18, 19 e 20 de Xullo.  O curso está dirixido a estudantes universitarios e tamén a calquera persoa interesada no mundo do cine. Cun total de 70 prazas, o prazo de inscrición vence o día 18 de xullo e os interesados deben dirixir a súa solicitude ao correo Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo .

Os obxectivos do presente curso son, por unha banda, dar oportunidade aos creadores para presentar e debater co público ao redor da súa obra, e, por outra, contribuír á visibilidade do cine propio nun contexto aínda adverso para a difusión por motivos estritos de mercado. O curso reforza o seu valor co engadido de estar dirixido con preferencia á comunidade universitaria con afán formativo e divulgativo, pero, ao tempo, ao cidadán interesando por coñecer o estado actual do audiovisual producido ou coproducido dende o país, sen renunciar a reclamar a atención mediática necesaria para algo tan elemental como constatar a súa existencia cando as pantallas convencionais lle cerran o seu paso.

Para esta edición optouse por un programa variado que igualmente reflicta a versatilidade do formato longametraxe (ficción, animación, documental), tamén da curtametraxe (animación) e, finalmente, a boa saúde creativa do audiovisual feito en Galicia. Tres xornadas sobre as que reflexionar como o audiovisual galego persegue consolidar a súa potencia creadora e a súa identidade á vez que, nun contexto de crise económica como o actual, ou simplemente por convicción propia, axustar os seus medios de produción para reafirmarse como cine singular e diferente.

Preme aquí para descargar o programa do curso

Datos de interese

DURACIÓN

30 horas

VALIDACIÓN

2 créditos de libre configuración ou 1 crédito ECTS

NÚMERO DE PRAZAS

70

COTA DE INSCRICIÓN

Alumnos da Univ. de Vigo bolseiros do Ministerio de Educación e doutras axudas económicas: 30 €

Alumnos non bolseiros, persoal docente e PAS da Universidade de Vigo: 45 €

Cidadáns censados no Concello de Celanova: 45 €

Amigos da Fundación Carlos Casares (tamén socias e socios do Instituto de Estudos Miñoranos): 45 €

Resto de solicitantes: 60 €

DESPRAZAMENTO GRATUÍTO

Sairá un autobús dende diante do Edificio Politécnico do Campus de Ourense,

ás 8:30 horas os días 18 e 19 de xullo, e ás 09.15 horas o 20 de xullo.

ALOXAMENTO GRATUÍTO

O Concello de Celanova ofrece aloxamento gratuíto aos matriculados no Albergue Municipal.

Os interesados deberán contactar co albergue (988.432.201) e reservar as noites que desexan

(durante a véspera do comezo do curso e ata a noite do 19 de xullo). No momento da primeira ocupación do cuarto deberase acreditar documentalmente a matrícula no curso.

DIRECTOR

Miguel Anxo Fernández

TALLER AUDIOVISUAL

Paulino Pérez Feijóo

DATAS

18, 19 e 20 de xullo de 2012

LUGAR

Auditorio Municipal Ilduara de Celanova (AMIC)

Organizan

Universidade de Vigo e a Vicerreitoría de Ourense

Fundación Carlos Casares

.