Skip to content

IEM - Instituto de Estudos Miñoranos

Increase font size Decrease font size Default font size

Destacados

PROSPECCIÓN ARQUEOLÓXICA, DOCUMENTACIÓN E RESTAURACIÓN DOS PETRÓGLIFOS DE GARGAMALA (Mondariz, Pontevedra)

Este proxecto de prospección arqueolóxica, documentación e restauración dos petróglifos de Gargamala (Mondariz), promovido polo Servizo de Arqueoloxía da Dirección Xeral de Patrimonio Cultural da Consellería de Cultura e Turismo, será executado polo equipo técnico multidisciplinar do Instituto de Estudos Miñoráns (IEM) dirixido e coordinado polo historiador e arqueólogo Xosé Lois Vilar Pedreira e do que forman parte: María Dolores Álvarez Rey, Eloy Martínez Soto, Bruno Centelles García, Xilberte Manso de la Torre, José Antonio Viña Arias, Eduardo Méndez-Quintas, Andrea Serodio Domínguez, Manuel Ledo Bernárdez e Jesús Rodríguez Diéguez coa colaboración especial, nas tarefas de prospección, de Cándido Verde e José Álvarez Alonso (O Buraco).

Nos días 5 e 6 de outubro de 2018 un incendio arrasou 150 Ha das parroquias de Sabaxáns e Gargamala (Mondariz) que afectou a área nuclear dos petróglifos de Gargamala con distinto grao de incidencia (termoclastos, ennegrecemento da superficie, arrastes de depósitos sobre as superficies) e deixando unha paisaxe depauperada e a pracer dunha forte erosión da tona terrea.

O conxunto de petróglifos obxecto desta actuación sitúase entre os 400 e os 470 m.s.n.m.. A gran maioría deles ocupando a parte alta dos outeiros (GA 36030023-18-11), as valgadas entre eles no caso do Campado (GA 36030055-14-15-54), chans como Campo Redondo (GA 36030038) cun amplísimo dominio visual ,que chega á Serra do Galiñeiro, parello ó emprazamento dos petróglifos da Coutada (Taboexa, As Neves) ou As Portaxes no Monte Tetón (Tebra, Tomiño) tamén obxecto de prospección, estudo, posta en valor e musealización por parte do Instituto de Estudos Miñoráns.

Na zona de actuación destaca a presenza dun ulleiro aproveitado polos veciños para a traída de augas doméstica e na outra vertente hai varios muíños hidráulicos.
Estamos ó redor das coordenadas 545.686/4.679.970 
(datum: ETRS 1989, fuso 29).

Esta concentración de petróglifos atópase na parroquia de Gargamala, no concello de Mondariz, composta polas aldeas de Vedrelos e O Soutiño na zona meridional e A Rúa, Mourelle, Boente e O Barro. A parroquia está rodeada por Frades, Riofrío, Sabaxáns e Toutón como freguesías do mesmo concello e polo norte polas de Traspielas e Ventín do concello de Fornelos de Montes. Estamos no sur do Suído nun mundo de serra onde as aldeas escasean e foi zona tradicional de pastoreo que deixou pegadas etnográficas nos chozos, neveiras, cerres para o gado e nos foxos de lobo.
Estamos no val medio-alto do río Tea cara o que drenan os núcleos habitados de Gargamala. A zona noroeste do Castro Chouso, O Foxo do Lobo, A Chan de Cairón... botan as augas no río Barragán que desauga no río Oitavén ó pé do castro da Cidade (Calvos, Fornelos) na mesma presa das Eiras.


Está en:  Inicio O IEM Acta constitución
Skip to content
Sinatura de convenios entre a Universidade de Vigo e o Instituto de Estudos Miñoranos PDF Imprimir Correo-e

O IEM - Novas
Venres, 25 Marzo 2011 22:44
conveniouviem

Un convenio marco de colaboración e dous específicos relativos ás areas de Arqueoloxía - Historia Antiga e mais Microtoponimia - Talsonimia foron asinados hoxe entre a Universidade de Vigo e o Instituto de Estudos Miñoranos.
Hoxe ás 12 da mañá, na Aula de Cultura de Pontes de Rosas, sede do Instituto de Estudos Miñoranos, procedeuse a sinatura de tres convenios de colaboración entre a Universidade de Vigo e o Instituto de Estudos Miñoranos. Coa presenza do Sr. Reitor Salustiano Mato de la Iglesia e do director do Instituto de Estudos Miñoranos Carlos Méixome Quinteiro asináronse os tres convenios.
O convenio marco de colaboración entre a Universidade de Vigo e o Instituto de Estudos Miñoranos determina as relacións entre ambas entidades e ten o propósito de desenvolver proxectos de investigación conxuntos, organizar actividades académicas (cursos, conferencias, simposios, seminarios...), apoiar investigadores e estudantes; intercambiar publicación e traballos de investigacións e colaborar en actividades culturais.
O primeiro dos convenios específicos fai referencia á colaboración en temas de Arqueoloxía e Historia Antiga segundo o cal a Universidade de Vigo prestará a colaboración técnica necesaria para a realización de prospeccións arqueolóxicas na bacía media da conca do Miño. Pola súa banda, o IEM colaborará no asesoramento externo nos traballos de prospección arqueolóxica no xacemento neolítico do Monte das Pedreiras e no asentamento calcolítico do Monte das Cabanas, ámbolos dous no campus de Vigo.
O segundo dos convenios específicos fai referencia á colaboración en temas de Microtoponimia e Talasonimia no que se acorda fusionar materiais e coñecementos entre o IEM e a Universidade de Vigo así como unha recollida exhaustiva de materiais para enriquecer e completar a web Toponimia e Topopedia aloxadas na web da Universidade de Vigo. Neste sentido o reitor Salustiano Mato sinalou que o Campus do Mar deberá acoller tódolos aspectos da investigación científica entre eles a Talasonimia.
Pola súa banda o director do IEM sinalou que a sinatura destes convenios tiña unha especial relevancia para o centro de estudos que dirixe xa que supón un recoñecemento por parte da primeira institución científica e académica do sur de Galicia.