Skip to content

IEM - Instituto de Estudos Miñoranos

Increase font size Decrease font size Default font size

Destacados

PROSPECCIÓN ARQUEOLÓXICA, DOCUMENTACIÓN E RESTAURACIÓN DOS PETRÓGLIFOS DE GARGAMALA (Mondariz, Pontevedra)

Este proxecto de prospección arqueolóxica, documentación e restauración dos petróglifos de Gargamala (Mondariz), promovido polo Servizo de Arqueoloxía da Dirección Xeral de Patrimonio Cultural da Consellería de Cultura e Turismo, será executado polo equipo técnico multidisciplinar do Instituto de Estudos Miñoráns (IEM) dirixido e coordinado polo historiador e arqueólogo Xosé Lois Vilar Pedreira e do que forman parte: María Dolores Álvarez Rey, Eloy Martínez Soto, Bruno Centelles García, Xilberte Manso de la Torre, José Antonio Viña Arias, Eduardo Méndez-Quintas, Andrea Serodio Domínguez, Manuel Ledo Bernárdez e Jesús Rodríguez Diéguez coa colaboración especial, nas tarefas de prospección, de Cándido Verde e José Álvarez Alonso (O Buraco).

Nos días 5 e 6 de outubro de 2018 un incendio arrasou 150 Ha das parroquias de Sabaxáns e Gargamala (Mondariz) que afectou a área nuclear dos petróglifos de Gargamala con distinto grao de incidencia (termoclastos, ennegrecemento da superficie, arrastes de depósitos sobre as superficies) e deixando unha paisaxe depauperada e a pracer dunha forte erosión da tona terrea.

O conxunto de petróglifos obxecto desta actuación sitúase entre os 400 e os 470 m.s.n.m.. A gran maioría deles ocupando a parte alta dos outeiros (GA 36030023-18-11), as valgadas entre eles no caso do Campado (GA 36030055-14-15-54), chans como Campo Redondo (GA 36030038) cun amplísimo dominio visual ,que chega á Serra do Galiñeiro, parello ó emprazamento dos petróglifos da Coutada (Taboexa, As Neves) ou As Portaxes no Monte Tetón (Tebra, Tomiño) tamén obxecto de prospección, estudo, posta en valor e musealización por parte do Instituto de Estudos Miñoráns.

Na zona de actuación destaca a presenza dun ulleiro aproveitado polos veciños para a traída de augas doméstica e na outra vertente hai varios muíños hidráulicos.
Estamos ó redor das coordenadas 545.686/4.679.970 
(datum: ETRS 1989, fuso 29).

Esta concentración de petróglifos atópase na parroquia de Gargamala, no concello de Mondariz, composta polas aldeas de Vedrelos e O Soutiño na zona meridional e A Rúa, Mourelle, Boente e O Barro. A parroquia está rodeada por Frades, Riofrío, Sabaxáns e Toutón como freguesías do mesmo concello e polo norte polas de Traspielas e Ventín do concello de Fornelos de Montes. Estamos no sur do Suído nun mundo de serra onde as aldeas escasean e foi zona tradicional de pastoreo que deixou pegadas etnográficas nos chozos, neveiras, cerres para o gado e nos foxos de lobo.
Estamos no val medio-alto do río Tea cara o que drenan os núcleos habitados de Gargamala. A zona noroeste do Castro Chouso, O Foxo do Lobo, A Chan de Cairón... botan as augas no río Barragán que desauga no río Oitavén ó pé do castro da Cidade (Calvos, Fornelos) na mesma presa das Eiras.


Está en:  Inicio Seccións Conferencias e obradoiros
Skip to content
Entrega do IV Premio de Poesía Victoriano Taibo - Entidade Local de Morgadáns, na Escola de Guillufe. PDF Imprimir Correo-e

Premio Victoriano Taibo - Artigos
Escrito por IEM   
Mércores, 09 Novembro 2011 22:34
1Carlos_Solla

O vindeiro sábado 12 de novembro o poeta pontevedrés  Carlos Solla, será galardoado coa entrega do IV Premio de Poesía Victoriano Taibo - Entidade Local de Morgadáns, pola súa obra Holocausto Zacoe.  O autor recibirá como premio unha escultura do artista miñorá Fino Lorenzo, 3.000 euros en metálico e a edición da súa obra. O acto terá lugar na Escola de Guillufe  en Morgadáns, ás 19 horas e é aberta ao público.

O premio.

O certame xestionado polo Instituto de Estudos Miñoranos e sufragado pola Entidade Local Menor de Morgadáns  foi instituído en memoria do poeta, académico e mestre de Morgadáns, Victoriano Taibo. No acto, que será presentado pola escritora Marta Dacosta presentárase tamén o libro premiado e estará animado polo grupo de gaitas "Balcón do Miñor", de Morgadáns.

Miguel Anxo Mouriño recordará a figura de Victoriano Taibo. Carlos Solla  dará lectura a fragmentos do seu poemario, despois de que o profesor Gonzalo Navaza dea lectura á acta do xurado e antes de que o director do IEM, Carlos Méixome, o Presidente da Entidade Local de Morgadáns, Urbano Esmerode e o alcalde de Gondomar, Fernando Guitián, procedan á clausura do acto.

O fallo do xurado.

O fallo desta IV edición do premio produciuse o pasado oito de setembro de 2011 por un xurado formado por Gonzalo Navaza Blanco, profesor e escritor, membro do IEM; Marta Dacosta Alonso, poeta e profesora, membro do IEM; Silvia Penas Estévez, poeta e cogañadora da segunda edición deste premio; a poeta e gañadora da terceira edición Goretti Fariña Caamaño e o escritor e mestre Miguel Anxo Mouriño Fernández, membro do IEM,  e no que actuou como secretario (sen voto) en representación do IEM, Carlos Méixome Quinteiro baixo a presidencia  do Presidente da Entidade Local de Morgadáns, Urbano Esmerode Domínguez (sen voto).

A obra.

O xurado valorou a unidade e a elección temática do orixinal. O libro é unha alegoría sobre a situación do idioma e da identidade do pobo galego. A ironía e o humor son os recursos fundamentais para esquivar o desacougo tráxico que os poemas nos relatan, pois malia o sorriso que conseguen debuxar en nós, non podemos ignorar a realidade negativa dos seus enunciados. Holocausto Zacoe é a demostración de que a poesía é divertimento e mensaxe, un medio para reflexionar e concienciarse da realidade que nos rodea.

O autor.

CARLOS SOLLA VARELA (Pontevedra, 1971), tamén coñecido  como Calros Solla, é escritor e profesor e activo membro da asociación cultural e ecoloxista  Verbo Xido da Terra de Montes. Ten publicado:

Ras e tritongos (antoloxía poética, 2003) que inclúe Xábregho (1999), Mel de arañas (2000)e Terras raras (2001)

Cerdedo. Materiais para o estudo da freguesía de San Xoán de Cerdedo. Inventario xeral (ensaio, 2002)

Cerdedo na obra do Padre Sarmiento (ensaio, 2002)

Cerdedo in the Voyager I (poesía visual, 2004)

Libro de reclamacións (poesía visual, 2005)

Almanaque de encantos. Mitoloxía da Terra de Cerdedo (ensaio, 2005)

Monte do Seixo. Reivindicación da Montaña Máxica (ensaio, 2007)

reGaliza e outras chuches (retrónicas, 2008)

Andar primeiro de río. Inmateriais do río dos Gafos (ensaio, 2008)

Kovi Kavuto. Lume de ollos en MazinGZ, premio Johan Carballeira 2010.

Parte da súa obra está publicada en revistas (como Verbo Xido), e libros colectivos, como Muller de doce sal. Homenaxe a Inés Canosa (2000), Das sonorosas cordas. 15 poetas desde Galicia (2005), Poesía contemporánea: Tabeirós-Terra de Montes (2005), Pontevedra literaria (2007) ou Polifonías II. Voces poéticas contra a violencia de xénero (2007).

As edicións anteriores do premio.

Os premios anteriores recaeron en  Carlos Negro por Cultivos Transxénicos (2008); Mª Carmen Caramés por Cuarto Minguante e Elvira Riveiro e Silvia Penas por Biografía da Multitude (2009) e en Goretti Fariña por Devastacións dispoñibles (2010)

Na realización deste acto colaboran tamén as empresas AGUA SANA e Adegas Val Miñor que permiten que ao seu remate se lles poida ofrecer un albaroque aos asistentes.