Skip to content

IEM - Instituto de Estudos Miñoranos

Increase font size Decrease font size Default font size

Destacados

XEIRAS IEM 2018- NIGRÁN- Ao son das campás de Parada. II Certame de Campás e Campaneiros. Martes 17 de xullo ás 18:30h.

O vindeiro martes 17 de xullo ás 18:30h terá lugar a cuarta xeira de verán polo concello de Nigrán (Parada) Ao son das campás de Parada. II Certame de Campás e Campaneiros, dentro do programa das xeiras de verán 2018 do IEM, e coa colaboración deste concello, que será guiada por Anxo Rodríguez Lemos.

O punto de encontro será na Igrexa de Santiago de Parada de Miñor:

HABERÁ DOUS INTÉRPRETES EN LINGUA DE SIGNOS PARA XORDOS.

Rosalía de Castro choraba co seu maxín, plasmado na súa obra Cantares Gallegos, as nostálxicas campás de Bastavales que atronaban co seu tocar o ceo do Val da Maía. Eran as campás un dos elementos sonoros que cada un levaba consigo no seu pensar xunto ás cantigas e pezas musicais aprendidas dende a nenez, rexedoras dun mundo daquela sen a sofisticada tecnoloxía actual pero ben regulado por un tocar encargado de marcar as horas de traballo, anunciar nacementos, casamentos, mortes, festas ou quizáis afastar as temerosas treboadas da comunidade. Modernas maquinarias a base de mazos electrónicos substitúen, aos poucos nas nosas parroquiais, ás mans daquelas persoas encargadas de facer falar as campás. Seguindo ás xornadas iniciadas no ano 2007 pola Asociación Cultural Os Chichisos de Pontevedra, o Instituto de Estudos Miñoráns iniciou en 2015 un certame na vila de Baiona chamado a continuar polas igrexas do Val de Miñor co fin de recoller, da man dos seus campaneiros, aqueles toques antigos en vías de desaparecer para sempre. Este ano serán dúas as campás, do século XIX e XX, as que, dende a igrexa parroquial de Santiago de Parada de Miñor, serán tocadas por Esther Nande Figueroa, sancristana e campaneira do lugar do Sobreiro, a partir das 18:30 na cuarta xeira do IEM.

Está en:  Inicio X aniversario Carta aos amigos e amigas do IEM
Skip to content
Carta aos amigos e amigas do IEM PDF Imprimir Correo-e

X aniversario IEM - Artigos
Escrito por IEM   
Luns, 19 Abril 2010 18:31
10 anos

 

Como ben sabedes no pasado mes de outubro o Instituto de Estudos Miñoranos cumpriu dez anos de andaina e troupeleo polo Val de Miñor e polo país adiante. Dez anos de reunións e proxectos, de entrevistas solicitando recursos, un local, apoio institucional,... para divulgar e impulsar a cultura e o patrimonio natural, histórico, artístico, arquitectónico, etnográfico, lingüístico… dos tres concellos do Val de Miñor, para promover a realización e publicación de estudos, para fomentar a conservación e o respecto polo patrimonio miñorano, fondamente inmersos, dende unha perspectiva humanista e universalista, na defensa e promoción da nosa identidade, do noso idioma e da nosa cultura.

 

Dez anos de ideas que medran e ideas que morren, proxectos que conseguen ver a luz e proxectos que dormen hibernados. Dez anos de erros involuntarios e sobre todo de moita vontade e esforzo.

Chegou o momento de celebralo. Por iso, no nome da Xunta de Goberno do Instituto de Estudos Miñoranos, diríxome a ti para convidarte ao acto poético-musical, a unha festa de aniversario, que terá lugar o próximo sábado 24 de abril ás 20h. no Auditorio Municipal “Lois Tobío” de Gondomar. Estarán con nós as voces poéticas de Anxo Angueira, Anxo Ratel, Maricarmen Caramés, Silvia Penas, Elvira Riveiro, Marta Dacosta, Carlos Negro, Miguel Anxo Mouriño..., os acordes sonoros do grupo de ska Kogito, do cantautor César Morán e as voces musicais de Coro Tradicional “Cantares do Brión”. Haberá tamén nesta acto algún momento para lembrar, sen nostalxia, as actividades realizadas ao longo destes dez anos.

Ao remate deste acto aberto ao público en xeral teremos unha cea de irmandade e aniversario no Restaurante “Rocamar” de Baiona. O prezo é de 25€ e precisamos confirmar o xoves 22, polo que antes desa data podedes facer a reserva no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo ou ben nos teléfonos 680 644 490 ou no 986 36 05 75 (polas tardes).                      

Como vos dicía queremos lembrar este décimo aniversario co ánimo afouto para que na próxima década o IEM se consolide como entidade capaz de manter unha actividade cultural permanente. Todos e todas vós sodes conscientes do difícil que é logralo sen a vosa desinteresada colaboración a que, como sabedes, estamos sempre abertos; máis tamén hai momentos en que a acción voluntaria precisa duns mínimos recursos económicos, nada doados de lograr e moito menos cando, empoleiradas na “crise”, as institucións reducen gastos e, como tamén coñecedes, comezan sempre polos xa cativos orzamentos dedicados a “cultura”. É por iso polo que me atrevo a pedirvos a vosa colaboración económica de dous xeitos. Primeiro facéndovos socios ou socias do IEM, polo que achego un .pdf coa ficha de inscrición, e en segundo lugar anunciándovos que temos en marcha o proxecto, coa xenerosa colaboración de cinco artistas, entre os que están confirmados Armando Guerra, Berta Cáccamo e Din Matamoro, de preparar unha carpeta de cinco serigrafías que tería un custe aproximado de 1.000€, aínda que tamén poderán ser adquiridas individualmente. Fágovos este adianto porque necesitamos ter unha certa seguridade, pos iso agradeceríavos que todas aquelas persoas interesadas en facerse co conxunto das serigrafías ou ben con algunha delas nolo comunicasedes para facer a correspondente reserva.

Agradecendo unha vez máis a vosa colaboración e agardando poder contar coa vosa presenza nesta festa de aniversario.

Cos mellores cumprimentos

Carlos Méixome

Director do IEM